جامعہ میں تعلیم و تربیت کا مقصد صرف علمی ترقی نہیں بلکہ دینی، اخلاقی اور شخصی تعمیر بھی ہے۔ اسی مقصد کے لیے درج ذیل اصول و ضوابط مرتب کیے گئے ہیں جن کی مکمل پاسداری ہر طالب علم پر لازم ہے۔

• ہر طالب علم پر لازم ہے کہ وہ پنج وقتہ نماز باجماعت ادا کرے۔
• مازِ جماعت کی حاضری کا باقاعدہ اندراج کیا جائے گا، جس کی نگرانی مہتمم یا متعلقہ نگران کریں گے۔
• جو طالب علم بغیر عذر کے مسلسل نمازِ جماعت سے غیر حاضر رہے گا، اسے پہلے تنبیہ کی جائے گی، اور اصلاح نہ کرنے کی صورت میں اس کے خلاف تادیبی کارروائی عمل میں لائی جائے گی۔

• طلبہ پر فرض ہے کہ وہ اپنے اساتذہ، ساتھی طلبہ اور جامعہ کے عملے کے ساتھ ادب و احترام سے پیش آئیں۔
• بدتمیزی، نظم و ضبط کی خلاف ورزی یا غیر اخلاقی رویہ ناقابلِ برداشت ہوگا۔
• اگر کوئی طالب علم متعدد بار تنبیہ کے باوجود اصلاح نہ کرے، تو مہتمم کو اختیار ہوگا کہ مناسب تادیبی کارروائی کے بعد اسے جامعہ سے خارج کر دے۔

• ہر طالب علم کا لباس اور ظاہری حلیہ اسلامی تعلیمات کے مطابق ہونا چاہیے۔
• غیر شرعی انداز، جیسے نامناسب بالوں کی تراش، غیر اسلامی لباس یا غیر ضروری لوازمات پہننے کی ممانعت ہے۔
• نگران کی تنبیہ کے باوجود اگر کوئی طالب علم اپنی وضع قطع میں اصلاح نہ کرے، تو اسے دارالاقامہ اور جامعہ دونوں سے خارج کیا جا سکتا ہے۔

• طلبہ کو نگران یا متعلقہ ذمہ دار کی پیشگی اجازت کے بغیر جامعہ یا دارالاقامہ سے باہر جانے کی اجازت نہیں ہوگی۔
• ضرورت کے وقت تحریری درخواست دے کر اجازت حاصل کرنا ضروری ہوگا۔
• بلا اجازت باہر جانے کی صورت میں متعلقہ طالب علم کے خلاف تادیبی کارروائی عمل میں لائی جائے گی۔

• ہر طالب علم کے لیے ضروری ہے کہ وہ تعلیمی اوقات میں باقاعدگی سے حاضر رہے۔
• غیر حاضری کی صورت میں مناسب وجہ پیش کرنا لازم ہوگا، بصورتِ دیگر غیر حاضری شمار کی جائے گی۔
• اگر کوئی طالب علم بغیر اجازت ایک ہفتے تک غیر حاضر رہے، تو اس کا نام رجسٹر سے خارج کر دیا جائے گا۔

• طلبہ کو کسی بھی سیاسی یا غیر سیاسی تنظیم سے وابستگی کی اجازت نہ ہوگی، جو جامعہ کے نظم و ضبط یا تعلیمی ماحول کو متاثر کرے۔
• کسی غیر قانونی یا ممنوعہ تنظیم سے تعلق ثابت ہونے کی صورت میں فوری طور پر کارروائی کی جائے گی، جس میں جامعہ سے اخراج بھی شامل ہے۔